Qeveria mohon emërimin e sekretarëve në baza partiake

Memli Krasniqi, i cili foli në emër të Qeverisë së Kosovës tha
të mërkurën se është çështje e Kuvendit të Kosovës që të merret me
Ligjin për vlerat e luftës, pasi sipas tij Qeveria e Kosovës e ka kryer
punën që i takon. Ai pas mbledhjes së Qeverisë së Kosovës
tha se ky ligj për të cilin kanë hyrë në grevë disa pjesëtarë të UÇK-së
para ndërtesës së qeverisë, është dashur të miratohet qysh në
legjislaturën e kaluar në Kuvend, por vendimi i Lidhjes Demokratike të
Kosovës për ta braktisur koalicioni e ka shtyrë miratimin e këtij ligji.

Po ashtu Krasniqi, tha se Qeveria e Kosovës momentalisht nuk mund të
ndihmojë familjet të cilat pësuan nga të reshurat në Prishtinë, për
faktin se komuna do të bëj vlerësimin e dëmeve dhe në rast se komuna nuk
mund t’i mbulojë dëmet, atëherë do të kërkohet nga qeveria që t’i
mbulojë ato shpenzime.
Në ndërkohë, Krasniqi ka mohuar se Qeveria e Kosovës po i emëron sekretarët nëpër ministri në bazë të preferencave politike.
Megjithatë, Veton Firzi i cili është emëruar sekretar në Ministrinë e
Kulturës në një solemnitet gjatë fushatës parazgjedhore është parë t’iu
ketë bashkuar Partisë Demokratike të Kosovës.
Ndryshe, në mbledhjen e Qeverisë u miratuan edhe disa projektligje. /Telegrafi/