Refuzohet ankesa e mbrojtjes së Haradinajt

Dhoma e Apelit e Tribunalit Ndërkombëtar për Krime Lufte në ish- Jugosllavi ka refuzuar kërkesën e mbrojtjes së Ramush Haradinajt, e cila muaj më parë pati paraqitur një dokument me prova me të cilat kishte synuar ta sfidojë prokurorinë me aktakuzën që e posedon.

Dhoma e Apelit ka urdhëruar me këtë rast Prokurorinë, që përveç dy dëshmitarëve të cilët kishin dështuar të paraqiten në gjykimin autentik, të thërras dëshmitarë të rinj në rigjykimin e pjesshëm, mungesa e të cilëve ka qenë arsyetim për hapjen e rigjykimit të pjesshëm.

“Mbrojta e Haradinajt tani do të shtyjë dhe do të kërkojë që rigjykimi i pjesshëm të fillojë sa më parë që të jetë e mundur, me shpresë brenda pak javësh”, ka njoftuar Besnik Tahiri nga AAK-ja. Sikurse më parë, edhe tani, sipas tij, vendimi është marrë nga shumica në Dhomën e Apelit, me presidentin e Tribunalit, gjyqtarin Patrick Robinsion, i cili, sipas tij, nuk është pajtuar me opinionin e shumicës.

Ekipi mbrojtës i liderit të Aleancës për Ardhmërinë e Kosovës, Ramush Haradinaj, kishte paraqitur ankesën në shkurt të këtij viti. Ankesa me dhjetëra faqe kishte paraqitur prova kundërshtuese për aktakuzën, sipas të cilës për krime lufte të kryera në zonën operative të Dukagjinit, akuzohen Ramush Haradinaj, Idriz Balaj e Lahi Brahimaj.

Mbrojtja nuk kishte kërkuar që lënda të mbyllet tërësisht por që prokuroria të paraqesë sa më shpejt faktet që pretendon se i posedon. /Zëri/Telegrafi/