Tadic: Marrëveshjet teknike me Prishtinën brenda 30-40 ditëve

Serbia mund të nënshkruaj marrëveshjet teknike me Kosovën brenda
30 apo 40 ditëve të ardhshme, tha të martën presidenti serb, Boris
Tadic, duke shprehur gatishmërinë për të përmbushur një kërkesë tjetër
të Bashkimit Evropian pas arrestimit të të dyshuarit për krime lufte,
Ratko Mladic.“Nuk është e lehtë të arrihet një progres i
shpejtë, por pres që të ketë rezultate në disa fusha, jo nesër, por
ndoshta në 30 apo 40 ditët vijuese”, tha Tadic gjatë një konference të
organizuar nga Qendra për Politika Evropiane, njoftoi agjencia gjermane e
lajmeve DPA.
Vizita e Tadiqit në Bruksel erdhi më pak se dy javë pas arrestimit të
Mladicit më 26 maj. Bashkimi Evropian e kishte bërë transferimin e
Mladicit në Tribunalin e Hagës si parakusht për ta çuar përpara
aplikimin e shtetit serb për anëtarësim në BE. Por, pak kohë pas
arrestimit, disa diplomatë evropianë vlerësuan se zhvillimi i
marrëdhënieve të mira fqinjësore me Kosovën do të jetë po ashtu një
kusht i rëndësishëm. /Telegrafi/