Familjarët nuk e dinë ku ndodhet dëshmitari “X”?

Bashkëshortja e dëshmitarit të koduar si “X” nuk di asgjë se ku
ndodhet bashkëshorti i saj. Ajo thotë se më 19 mars është marrë nga
EULEX-i dhe nuk e ka parë më. Dëshmitë e dëshmitarit gjykata i
konsideron të besueshme. EULEX-i ndërkohë nuk ka dashur të flasë asgjë se ku ndodhet dëshmitari “X”, shkruan Koha Ditore.
“Ne nuk komentojmë asgjë lidhur me këtë dëshmitar”, ka thënë
kryeprokurorja e Prokurorisë Speciale të Kosovës, Izabelle Arnal,
nëpërmjet zëdhënësit të EULEX-it. Blerim Krasniqi.
Ndërkohë, si pasojë e dëshmive dhe provave të ofruara nga ky
dëshmitar, Gjykata e Qarkut në Prishtinë ua ka vazhduar edhe për një
muaj pesë ish-pjesëtarëve të UÇK-së dhe për një muaj dhe dy të tjerëve
arrestim shtëpiak.
Nga ana tjetër, dy ish-pjesëtarë të UÇK-së, Ali Mejzinolli,
ish-komandant i kompanisë IV të batalionit “Ymer Alishani” dhe Naser
Shala, ish-drejtor për marrëdhënie publike dhe administrim civil kanë
paralajmëruar padi kundër dëshmitarit “X” në një reagim publik. Ata kanë
thënë se dëshmitë e tij janë të pavërteta. /Telegrafi/