Valë tjetër e rritjes së çmimeve

Vendosja e taksës doganore prej 10 për qind për produktet e
Serbisë, Bosnjës e Hercegovinës dhe Moldavisë, sipas analistëve të
çështjeve ekonomike, do të sjellë edhe një valë të rritjes së çmimeve.
Analistët theksojnë se qytetarët, për shkak të interesit të tyre
financiar, duhet të përqendrohen në blerjen e produkteve vendore apo të
vendeve tjera.Paralajmërimet e Qeverisë së Kosovës për
vendosjen e taksave doganore për 10 për qind për të gjitha produkte që
vijnë nga Serbia dhe Bonja e Hercegovina, ka shqetësuar qytetarët e
Kosovës dhe ekspertët e ekonomisë.
Këta të fundit, thonë se me aplikimin e kësaj takse doganore, do të ketë rritje të çmimeve.
Arian Zeka, nga Oda Amerikane e Kosovës, thotë se ekzistojnë produkte
alternative në treg, të cilat do të mund t’i zëvendësonin produktet të
cilat vijnë nga Bosnja e Serbia. “Si do të duhej të reagonin qytetarët
karshi kësaj ngritjeje të çmimeve? Besoj që ekzistojnë produkte
alternative në treg, të cilat do të mund t’i zëvendësonin produktet që
vijnë nga Bonja e Serbia. Qytetarët, për shkak të interesit të tyre
financiar, duhet të përqendrohen në blerjen e këtyre produkteve
alternative”, thekson Zeka.
Qytetarët thonë se ngritja e çmimeve të ushqimit do të shtyjë më tepër njerëz në varfëri.
Ata bëjnë thirrje për të luftuar inflacionin, i cili që nga fillimi i këtij viti ka shënuar rritje.
Institucionet e Kosovës kanë deklaruar tashmë se nuk mund të ndikojnë
në uljen e çmimeve, por kanë premtuar se do të shqyrtojnë mundësinë për
zbutjen e kësaj gjendjeje.
Të dhënat zyrtare të institucioneve të Kosovës tregojnë se eksporti i
Serbisë në Kosovë vazhdon të dominojë. Gjatë vitit 2010, Serbia dhe
Bosnja e Hercegovina, kanë eksportuar mallra në Kosovë me vlerë prej 300
milionë eurosh.
Ky trend ka vazhduar edhe gjatë 2011-ës, thonë përfaqësuesit e bizneseve.
Ndërkaq, Arian Zeka nga Oda Ekonomike Amerikane, mendon se për të mos
u ballafaquar më këtë rritje të çmimeve, Qeveria e Kosovës do të duhej
të aplikonte embargo për produktet që vijnë nga Serbia dhe Bosnja. “Pas
këtij aplikimi të taksës 10 për qind, ne, Oda Ekonomie Amerikane,
mendojmë që autoritet kosovare duhet të kalojnë në masë të plotë të
reciprocitetit, që është mos pranimi i vulave doganore të këtyre dy
vendeve”, thotë ai.
Autoritetet kompetente tashmë kanë deklaruar se është çështje javësh
kur do të vendosin masa reciproke ndaj Serbisë dhe Bosnjës, shtete këto,
të cilat nga viti 2008 kanë bllokuar të gjitha produktet kosovare. /Rel/Telegrafi/