Qeveria edhe mbi gjyqësorin

Qeveria e Kosovës ka vazhduar me tejkalimin e kompetencave ekzekutive. Pas “dirigjimit” të vazhdueshëm që po i bën Kuvendit të Kosovës, Qeveria e drejtuar nga Hashim Thaçi, po pretendon që të fus nën kontroll të plotë edhe degën e tretë të pushtetit- gjyqësorin, i cili sipas Kushtetutës së Kosovës funksionin si i pavarur.

Vendimi i qeverisë për formimin e Këshillit Konsultativ për Drejtësi, i cili i obligon drejtuesit e gjyqësorit të jenë pjesë e këtij këshilli, i cili drejtohet nga zëvendëskryeministri Hajredin Kuçi, është ndërhyrje direkte në punën e gjykatave dhe prokurorive si dhe është në kundërshtim me Kushtetutën e vendit, shkruan gazeta Zëri.

Mirëpo, vendimi i qeverisë i cili ka hyrë në fuqi nga 1 qershori, ka hasur në “rezistencë” nga drejtuesit e gjyqësorit.

Kjo për faktin se disa institucione të drejtësisë në vend, kanë refuzuar dërgimin e përfaqësuesve të tyre me arsyetimin se nuk marrin urdhra nga ekzekutivi për shkak se gjyqësori është shtyllë e pavarur dhe si e tillë nuk duhet urdhëruar nga qeveria.

“Nuk mund të urdhërohet nga qeveria një institucion siç është Këshilli Gjyqësor i Kosovës për shkak se me Kushtetutë është i pavarur”, thotë kryetari i Gjykatës Supreme të Kosovës, Fejzullah Hasani. /Telegrafi/