Hyseni: Qeveria ka mungesë vizioni

Ish-Ministri i Punëve të Jashtme, Skënder Hyseni, ka deklaruar se qeveria është e paaftë për të siguruar njohje të reja për Kosovën. Në një intervistë për televizionin ‘Albanian Screen’, Hyseni ka kritikuar ashpër ‘Qeverinë Thaçi 2’ në këtë drejtim.

“Pengesat kryesore për këto ngecje është mungesa e vizionit të qeverisë së Kosovës për arritjen e njohjeve. Mungesa e guximit për të adresuar qartë arsyet për mungesën e njohjeve dhe mungesa e një plani të saktë dhe të qartë në fushën e marrëdhënieve ndërkombëtare, përkatësisht në politikën e jashtme”, ka thënë Hyseni.

Një pengesë tjetër për këtë mungesë të gjatë të njohjeve deputeti Hyseni thotë se janë bisedimet me Serbinë, të cilat kanë bërë që shumë shtete të presin së pari epilogun e tyre. Sipas Hysenit, Qeveria e Kosovës ka dështuar në fushatën për t’i shpjeguar botës se ky dialog nuk është për statusin, por është për çështje teknike, dialog për bashkëpunim ndër-shtetëror.

Partia e ish-ministrit Hyseni, Lidhja Demokratike e Kosovës në anën tjetër i ka quajtur të pazbatueshme marrëveshjet me Serbinë pa ratifikimin e tyre në Kuvendin e Kosovës. Sipas LDK-së, pretendimi i Qeverisë ë Kosovës se ka arritur tri marrëveshje me Serbinë, nëpërmjet Konkluzioneve të Kryesuesit, nuk është në përputhje me Kushtetutën e Republikës së Kosovës dhe me Rezolutën e Kuvendit për Bisedimet me Serbinë. /Telegrafi/