Cooper: Tahiri të informojë publikun

Ndërmjetësuesi i Bashkimit Evropian në bisedimet Prishtinë-Beograd, britaniku Robert Cooper, u ka rekomanduar dy shefave të ekipeve negociatore, Edita Tahirit dhe Borisllav Stefanovic, që të informojnë saktë opinionin në Kosovë dhe Serbi për marrëveshjet, atë që është arritur në Bruksel, në mënyrë që të mos ketë konfuzione.

Cooper në një intervistë ekskluzive për “Zëri” thotë se i kupton të dy palët që të shprehin këndvështrimet e tyre, por marrëveshjet janë të qarta dhe se Tahiri e Stefanovic, sipas tij, e kanë përgjegjësi të informojnë publikun e tyre.

Anglezi Cooper paralajmëron se marrëveshja për regjistrat civilë, ajo për liri të lëvizjes dhe marrëveshja për targat, nuk do të jenë të vetmet në procesin negociues. Në takimin e radhës që pritet të mbahet para pushimeve verore, ai thotë se mund të ketë marrëveshje të reja, por nuk e specifikon se për cilat çështje.

Por, më me rëndësi, sipas Cooper, është implementimi i marrëveshjeve, e për një gjë të tillë ai obligon palët në bisedime dhe grupet punuese, që do të krijohen për të lehtësuar zbatimin e marrëveshjeve të arritura mes dy vendeve.

Në qoftë se grupet implementuese hasin në problem për të zbatuar marrëveshjet e arritura, Cooper thotë se ato grupe bashkë me Edita Tahirin e Borko Stefanoviq do të ulen sërish në tavolinën e negociatave për të diskutuar për çështjet që kanë problem në zbatim.

Pavarësisht fjalëve të Borisllav Stefanovic se Serbia është fituese dhe se Kosova është humbëse në këto bisedime, Cooper thotë se bisedimet nuk janë garë në të cilën ka fitues dhe humbës. Sipas tij, të dyja palët janë fituese, ngase u afrohen standardeve të BE-së, përkatësisht Bashkimit Evropian. /Telegrafi/