Më 31 gusht bisedohet për demarkacionin me Serbinë

Komandanti i KFOR-it, Erhart Buhler, ka thënë se marrëveshja e arritur në mes të KFOR-it, palës serbe dhe institucioneve të Kosovës, megjithëse nuk është zbatuar në tërësi, është e vlefshme deri në rifillimin e negociatave të Serbisë dhe Kosovës.
Ai ka thënë se në Rudare ende ka bllokadë rrugësh dhe për qarkullim të trupave po përdorin rrugë alternative. Ai ka shtuar se janë në kërkim të kryerësve të vrasjes së policit dhe ndezjes së pikës kufitare në Jarinjë.

Buhler ka shtuar se kalimin kufitar në Jarinjë e kanë nën kontroll, ndërsa kufiri në Bërnjak është nën kontroll të KFOR-it, EULEX-it e Policisë së Kosovës.

“Me gjendjen e re radikalët dhe kriminelët nuk pajtohen, sepse ata kanë fituar milionat”, ka thënë Buhler, dhe ka shtuar se sot do të formohet një komision në përbërje të KFOR-it, EULEX-it dhe Policisë së Kosovës, ku do të përgatitet një takim me palën serbe për caktimin e vijës administrative dhe kadastrale në zonën e kontestuar. Takimi me forcat serbe, për këtë çështje, do të bëhet me 31 gusht, raporton RTK. /Telegrafi/