Zvarritet miratimi i Ligjit për Prishtinën

Qeveria e Kosovës vazhdon ta neglizhojë miratimin e Ligjit për Prishtinën, i cili i shkakton kryeqytetit humbje milionëshe. Ky projektligj - i cili pati acaruar raportet ndërmjet partnerëve të koalicionit të kaluar qeverisës PDK-LDK - akoma nuk është proceduar në Kuvend për miratim.

Pikët kontestuese të draftligjit për Prishtinën - që si pasojë kanë zvarritur tash e sa kohë miratimin e tij - kanë të bëjnë me grantet qeveritare për kryeqytetin dhe menaxhimin e Pallatit të Rinisë dhe Sporteve nga Komuna e Prishtinës.

Sadri Ferati, ish-ministër i Administrimit të Pushtetit Lokal (MAPL), thotë se miratimi i këtij ligji vazhdon të ketë mungesë të vullnetit politik.

“Nuk ka kurrfarë pengesash ligjore apo administrative që ky ligj të mos miratohet”, ka thënë Ferati për “Zëri”.

“Komisioni as nuk e di se ku është tani ky ligj, as a është në Ministri të Pushtetit Lokal apo në kryeministri”.

Besnik Osmani, sekretar në MAPL, ka thënë se kjo Ministri e ka vlerësuar draftin, e ka shqyrtuar dhe se pa ndonjë ndryshim e ka dorëzuar në kryeministri.

“Sipas rregullore së Qeverisë, Zyra e Kryeministrit e themelon grupin ndërministror për ta miratuar draftin tonë dhe më pas e dërgon në Kuvend për miratim”, ka thënë Osmani, për të shtuar se ky ligj mund të procedohet kah mesi i shtatorit.

Osmani sqaron se drafti i dorëzuar në Qeveri nuk ndryshon shumë prej të kaluarit. Pra, mbetet neni për grantin shtesë për Prishtinën, prej 4 për qind të grantit total të komunave të Kosovës.

AAK ka qenë më e zëshmja për miratimin e Ligjit për Prishtinën. Për Besnik Tahirin, kjo neglizhencë është e pashpjegueshme.

“Nuk ka shpjegim racional se përse bënë këtë Qeveria”, ka thënë ai. /Telegrafi/