Në kabllogramet e Wikileaksit ka edhe trillime!

Zëvendëskryeministri Hajredin Kuçi, është zyrtari i radhës që reagon lidhur me publikimin e kabllogrameve nga WikiLeaks, të marra nga departamenti i shtetit amerikan.

“Ka diçka të vërtetë dhe diçka që s’është thënë asnjëherë, që janë trillime. PDK-ja ka nevojë për reforma për njerëz të ri gjithmonë në kuptimin simbolik, në anën tjetër nuk është thënë për emra të përveçëm. Unë asnjëherë nuk flas për emra të përveçëm. Do të thosha që raporti me luftën është e vetmja vlerë që fillimisht më ka lidh me PDK-në. Unë nuk e di kush ka trilluar, mund ta pyetni dikë tjetër, por e them sinqerisht që dy nga emrat e përfolur i kam 90 % më tepër miq se të tjerët”, ka deklaruar Kuçi, raporton Koha.

Këto komente ai i ka bërë pas takimit të parë formal që ka pasur me ambasadorin gjerman në Kosovë, Ernst Reichel. Kuçi ka thënë se kanë biseduar për marrëdhëniet Kosovë-Gjermani, nënshkrimin e marrëveshjeve bilaterale, si dhe ka paralajmëruar se ndër marrëveshjet që do të lidhen së shpejti është edhe ajo për ekstradim. Ndërsa diplomati gjerman ka përmendur edhe njëherë përkushtimin e Gjermanisë për të ndihmuar Kosovën në sfera të ndryshme. /Telegrafi/