Në veri qetë, por nën tensione

Situata në veri të Kosovës është e qetë dhe nën kontroll, thonë autoritetet policore në Mitrovicë.

“Situata e përgjithshme vazhdon të jetë e qetë dhe e normalizuar pas ngjarjeve të mbrëmshme, ku patëm një shqetësim te të gjithë qytetarët. Situata është vënë nën kontroll shumë shpejtë dhe edhe gjatë natës së mbrëmshme, por edhe sot (e shtunë) deri në këtë orë nuk është shënuar asnjë incident i vetëm. Policia e Kosovës vazhdon të kryejë detyrat e saja në përkrahje të EULEX-it dhe KFOR-it dhe janë duke monitoruar për së afërmi situatën”, ka thënë Hoti, ndërsa transmeton RTK.

Ndërkohë, serbët, thuhet se kanë përforcuar barrikadat e tyre të vendosura edhe në afërsi të urës të lumit Ibër, e cila vazhdon të jetë e mbyllur për qarkullimin e automjeteve. I ashtuquajturi ministër për Kosovën, Goran Bogdanovic, ka biseduar në Zveçan me përfaqësuesit e komunave paralele të veriut, të cilët kanë thënë se nuk do të heqin dorë nga protestat dhe barrikadat dhe se kanë nevojë për mesazhe dhe ndihmë konkrete nga Beogradi.

Nga ana tjetër, zyrtarë serbë thonë se i kanë paraqitur Bashkimit Evropian një propozim për zgjidhjen e problemit në pikat kufitare në Jarinje dhe Bërnjak- sipas të cilit, policët e Kosovës dhe zyrtarët e doganave të Kosovës nuk duhet të jenë aty. /Telegrafi/