Stefanovic: Temë kryesore – veriu!

Shefi i ekipit serb për bisedime me Prishtinën, Borislav Stefanovic, ka thënë se dialogu do të shtyhet dhe se Serbia te bashkësia ndërkombëtare ka arritur që të ndikoj që fillimisht të flitet për zgjidhjen e konfliktit në veri. Nga rrjedha e këtyre bisedimeve, thotë ai, varet nëse do të vazhdojnë takimet me përfaqësuesit e Prishtinës.

“Dialogu me Prishtinën do të vazhdojë nëse kemi rezultate konkrete për Jarinjën dhe Bërnjakun, dhe është mirë që bashkësia ndërkombëtare e ka parë këtë çështje si prioritet”, ka thënë ai, citojnë mediat e Beogradit.

Stefanovic do t’i vazhdojë sot në ora 9 e 30 bisedimet me ndërmjetësin evropian Robert Cooper dhe me zëvendës-ndihmëssekretarin amerikan, Philip Reeker.

Ai ka thënë se “aktet e njëanshme të Prishtinës me të ashtuquajturit doganierë të Kosovës e kanë induktuar krizën dhe janë shkaktarët që në njërën anë nxisin barrikadat e në anën tjetër sjellin deri te dhuna e papranueshme e KFOR-it”. /Telegrafi/