Dell ka “simpati” për FER-in

Ambasadori i Shteteve të Bashkuara në Kosovë, Christopher Dell, e ka quajtur zhvillim pozitiv daljen në skenë të partive të reja që, siç tha ai, duan të definojnë një të ardhme më të mirë për Kosovën.
“Për një kohë të gjatë ju u keni kërkuar njerëzve që të përfshihen dhe të dalin me ide të reja. Andaj jam i lumtur që shoh parti të tilla që duan të shohin një të ardhme më të mirë për shtetin e tyre dhe ky është një zhvillim i rëndësishëm”, tha Dell pas një takimi me udhëheqësit e partisë “Fryma e Re”.

Ambasadori amerikan mohoi se do të takojë përfaqësues të Lëvizjes “Vetëvendosje”, parti e cila po ashtu ka dalë së fundi në skenën politike kosovare dhe për herë të parë do të garojnë në zgjedhjet e 12 dhjetorit.

I pyetur për pjesëmarrjen e politikanëve që janë nën hetime, diplomati amerikan tha se “është detyrë e KQZ-së që t’i hetojë ata dhe të zbatojë një standard të qëndrueshëm për të gjithë”, njofton REL.

Ditë më parë, zyrtarë të lartë të EULEX-it, janë shprehur se nuk është në të mirën e imazhit të Kosovës që politikanët që janë nën hetime të kandidojnë në garën elektorale për zgjedhjet e përgjithshme të 12 dhjetorit.