Edhe më tej jemi më optimistët në rajon

Prishtinë, 28 dhjetor - Mbi 55 për qind e qytetarëve të Kosovës presin që viti 2011 do të jetë më i mirë se viti 2010, bëjnë të ditur rezultatet e hulumtimit “Barometri global”, të realizuar nga “Gallup International”. Sipas këtij hulumtimi, qytetarët e Kosovës janë më optimistët në rajon, ndërsa qytetarët e Serbisë janë deklaruar si më pesimistët në rajon.
Sipas agjencisë së lajmeve INA, vetëm 11 për qind e serbëve kanë shprehur vlerësime optimiste, duke rezultuar si populli më pesimist në rajon. Anketa e prezantuar thekson se më pak optimistë janë edhe qytetarët e BeH-së, Bullgarisë dhe vendeve tjera evropiane.
Hulumtimi i “Gallup International” është realizuar në 53 shtete, në të cilat jetojnë 76 për qind e popullsisë botërore.
Sipas kësaj ankete, del se 42 për qind e qytetarëve në botë janë optimistë se viti 2011 do të jetë më i mirë se ai 2010, ndërsa 19 për qind janë pesimistë.
Qytetarët më optimistë janë nga Suedia, Finlanda, Danimarka dhe Zvicra, të cilët del se janë më të kënaqurit në botë.