Ben Emmerson - avokat i Haradinajt dhe i Julian Assange

Duket se me të drejtë zyrtarët e Aleancës për Ardhmërinë e Kosovës besojnë pa rezervë në ekipin mbrojtës, që sipas tyre do ta shpëtojë edhe njëherë ish-kryeministrin kosovar Ramush Haradinaj.

Ish-komandanti i zonës operative të Dukagjinit, Ramush Haradinaj dhe gazetari Juliane Assange i cili me publikimet e tij prishi qetësinë e diplomacive botërore, mund të mos jenë takuar asnjëherë, por ata tashmë ndajnë diçka të përbashkët.

Është avokati Ben Emmerson i specializuar në ligjin ndërkombëtar dhe të drejtave të njeriut, të drejtës ndërkombëtare dhe penale kushtetuese e publike, i cili vazhdon ta përfaqësojë ish-komandantin e UÇK-së në Hagë, sikurse është bërë zëri mbrojtës i Julian Assange në procesin gjyqësor kundër tij, raporton “TCH”.

Ben Emmerson punon në të njëjtën kompani ligjore me avokaten Cherie Blair, bashkëshorten e ish kryeministrit Britanik Tony Blair. Ai ka qenë avokat kryesor në më shumë se 25 çështje që kanë kaluar në Gjykatën e Strasburgut. Biografia e tij flet edhe për fitoren në rastin e Ramush Haradinajt në prill të vitit 2008-s, ku pas një gjykimi disa vjeçar Haradinaj u shpall i pafajshëm për të gjitha akuzat.

Pjesë e ekipit mbrojtës të Haradinajt është po kështu Rodney Dikson dhe Michael O’Reilly. Ky i fundit është koordinator i ekipit mbrojtës që prej fillimit.

Punën e tij në Kosovë O’Reilly e nisi si drejtor i NDI për Kosovën. Por, e braktisi këtë pozitë për të punuar si këshilltar i Ramush Haradinajt në kohën kur Haradinaj drejtonte qeverinë e Kosovës. Dhe, duket se do të mbahet mend si koordinator i ekipit që do të mbrojë luftën e UÇK-së para Gjykatës së Hagës, veçanërisht në zonën e Dukagjinit e cila komandohej nga Haradinaj. /Telegrafi/